www.hreindyr.is :: Veiðistjórnunarsvið Umhverfisstofnunar

19. ágúst 2009 (myndir nýtt)

Mikil suðaustanrigning gengur nú yfir Austurland, ekki viðrar því vel til hreindýraveiða í dag. Aðeins eru leiðsögumenn búnir að skrá sig inn á svæði 1 og 2. Á svæði 1 fer Benni Óla með einn í tarf, Snæbjörn fer þangað með tvo einn í tarf og annan í kú, og Eiríkur fer með einn í kú. Eftirtaldir far á svæði 2. Magnús Karls með tvo í tarfa, Alli með tvo í kýr, Helgi Jenss. með einn í tarf og annan í kú, Tóti Borgars með einn í kú og Siggi Aðalst með einn í kú.

Þrátt fyrir mikla rigningu og óhagstætt veður tókst mönnum að klára veiðar á svæði 1 og 2 en þar voru einu veiðimennirnir á ferðinni. Tvær kýr og tveir tarfar fellt á svæði 1. Tarfarnir voru ofan við Hofteig. Á svæði 2 voru felldir þrír tarfar og 6 kýr - allt úr um 200 dýra hjörð sem var við Fitjahnjúk.

Stefán Jónsson við tarf sinn felldan á Smjörvatnsheiði á svæði 1. Tarfurinn er mjög einkennilega hyrndur. Tarfurinn var felldur á um 140 metra færi með 308. Leiðsögumaður var Snæbjörn Ólason

Guðmundur Jensson og leiðsögumaður hans Snæbjörn Ólason við kú sem Guðmundur felldi á Smjörvatnsheiði á svæði 1. Veðrið var þoka og rigning en rofaði annað slagið til. Kýrin skotin á um 200 metra færi með 308.

Hjalti B. Axelsson við kú sína. Frásögn Hjalta kemur hér: Fór ásamt leiðsögumanni mínum Þórhalli Borgarssyni og með mér var aðstoðarmaður (gormaður) Heimir Heiðarsson. Fórum við af stað þann 19.08. um hádegisbil, veður þennan dag var leiðinlegt frekar, rigning og lélegt skyggni. Eftir talsverða göngu um Fljótsdalsheiði utan við Bessastaðabrekkur þar sem við urðum ekki varir við nein dýr héldum við inn að Snæfelli en það höfðum við frétt af stórri hjörð sem haldið hafði suður að Bjálfafelli. Við vorum komnir innfyrir Snæfell um kvöldmatarleitið og fórum að leita dýranna. Fundum um síðir um 20 dýra hóp sem var mjög styggur og eltumst við við hann og komumst ekki í færi til að skjóta fyrr en um 21:30 og var það eina tækifærið sem okkur gafst til að skjóta. Hjörðin var rétt um 200 metra frá okkur, Þórhallur sagði mér að skjóta fremsta dýrið, ég gerði mig kláran og hann sagði skjóttu núna og skot reið af og kýrin féll. 44 kg. kú. Veiðistaðurinn er Mosdalur. Kúin felld með 300 magnum riffli.

Meðfylgjandi mynd sýnir að skuggsýnt var orðið þegar kúin féll. Ekki nema um 20 mínútur liðu frá því að kúin féll þangað til myrkur var skollið á.

Skrifað 19.08.09

Prenthæf síða